ہفتہ , 24 اکتوبر 2020ء
(290) لوگوں نے پڑھا
لاہور سے تعلق رکھنے والی پہلی خاتون ٹریفک وارڈن عالمی ادارے اقوامِ متحدہ کے مشن میں وطن کا نام روشن کرنے کیلئے روانہ ہو گئی ہیں۔ پنجاب سے اقوامِ متحدہ مشن کیلئے روانہ ہونے والی خاتون ٹریفک وارڈن سلمیٰ عبدالغنی پاکستانی پولیس کی جانب سے سوڈان میں نمائندہ ہوں گی۔ پنجاب پولیس کے سی ٹی او سیّد حماد عابد نے خاتون ٹریفک وارڈن کو رخصت دے دی، لاہور پولیس سے تعلق رکھنے والی وارڈن سلمیٰ عبدالغنی اور ڈی ایس پی محمد خان اقوامِ متحدہ کے مشن میں پاکستان کا نام روشن کریں گے۔ اقوامِ متحدہ کے کسی بھی مشن میں پاکستانی پولیس 9 سال بعد شریک ہوگی، اقوامِ متحدہ مشن کیلئے پاکستان بھر سے 361 افسران کا انتخاب عمل میں لایا گیا جن میں سے 12 کا تعلق صوبہ پنجاب سے ہے جو سوڈان جائیں گے۔ سوڈان مشن پر جانے والے 27 افسران پنجاب کے علاوہ پاکستان کے دیگر صوبوں سے تعلق رکھتے ہیں۔ سی ٹی او کے مطابق سلمیٰ عبدالغنی کا یہ اعزاز پولیس فورس کیلئے قابلِ فخر ہے۔ پاکستانی خواتین پولیس سمیت ہر شعبے میں نمایاں کردار ادا کر رہی ہیں۔