جمعہ , 08 جنوری 2021ء
(222) لوگوں نے پڑھا
لاہور کے علاقہ ملت پارک کے رہائشی بزرگ میاں بیوی کے قاتل کو پولیس نے گرفتار کر لیا۔ تفصیلات کے مطابق ملزم عبدالغفار جو کہ مقتولین کا پڑوسی بھی ہے نے 20 نومبر کو 80 سالہ انور بٹ اور ان کی بیوی 76 سالہ نسیم سے نشے کی لت پوری کرنے کے لئے پیسوں کا تقاضہ کیا۔ منع کرنے پر ملزم آپے سے باہر ہوگیا اور ہتھوڑے کے پے در پے وار کر کے دونوں کو بے دردی سے قتل کردیا اور گھر میں موجود موبائل فون اور دیگر قیمتی اشیاء چوری کر کے موقع سے فرار ہو گیا تھا۔ پولیس کو اطلاع ملنے پر پولیس نے موقع پر پہنچ کر لاشوں کو اپنی تحویل میں لے کر مقدمہ درج کرکے تفتیش شروع کردی تھی۔ شکوک کی بنا پر پولیس نے عبدالغفار کا سابقہ ریکارڈ چیک کیا اور اسے تفتیش کے لئے تھانہ بلوا لیا۔ دورانِ تفتیش عبدالغفار نے اپنے جرم کا اعتراف کر لیا اور کہا کہ وہ اپنے کیے پر شرمندہ ہے اور اپنے لئے خود ہی موت کی سزا تجویز کرلی۔
