رحمت اللعالمین ﷺ کی ولادت کا جشن مذہبی جوش و جذبے سے منایا گیا

پاکستان سمیت دنیا بھر میں سرورِ کونین، رحمت اللعالمین، آقائے دو جہاں حضرت محمد ﷺ کی ولادت کا جشن مذہبی عقیدت و احترام سے منایا گیا، لاہور میں دن کا آغاز 21 توپوں کی سلامی سے کیا گیا، پاک فوج کے جوانوں نے اللہ اکبر اور پاکستان زندہ باد کے نعرے بھی لگائے، توپوں کی سلامی کے بعد ملک kکی سلامتی کے لیے دُعائیں بھی کی گئیں۔ سرکار کی آمد مرحبا، دلدار کی آمد مرحبا، سرکار دو عالم حضرت محمد ﷺ کی ولادت کا جشن آج دنیا بھرمیں مذہبی عقیدت و احترام سے منایا گیا، شہر شہر قریہ قریہ ریلیاں نکالی گئیں، کوچہ کوچہ رنگ برنگی روشنیوں سے جگمگا اٹھا، درود و سلام کی صداؤں سے فضائیں معطر ہو گئیں، لاہور میں بھی آقائے دو جہاں محمد صلی اللہ علیہ وسلم کو خراج عقیدت پیش کرنے کیلئے 21 توپوں کی سلامی دی گئی، پاک فوج کے چاق وچوبند دستے نے پاکستان زندہ باد کے نعرے لگائے، فضا پاک فوج کے جوانوں کے نعروں سے گونج اٹھی ، مساجد میں نمازِ فجر کے بعد ملک کی سلامتی اور خوشحالی کے لیے خصوصی دعائیں کی گئیں۔ وزیراعلیٰ پنجاب عثمان بزدار نے امت مسلمہ کو عید میلاد النبی ﷺ پر مبارکباد دیتے ہوئے کہا کہ حضورا کرمؐ کی تعلیمات پر عمل پیرا ہو کر معاشرے سے ظلم ختم کیا جاسکتا ہے، آپؐ کی زندگی مجسم قرآن ہے جس میں مکمل رہنمائی اور ہدایت موجود ہے، حضورکریمؐ نے مختصر مدت میں مثالی سماجی اور معاشی نظام دیا۔