جمعرات , 08 اکتوبر 2020ء
(176) لوگوں نے پڑھا
لاہور کے علاقے باغبان پورہ میں ڈاکوؤں نے مزاحمت کرنے پر 50 سالہ شخص کو فائرنگ کر کے قتل کر دیا۔ باغبان پورہ پولیس کے مطابق 50 سالہ عزیز اپنے دوست خالد کے ساتھ اے ٹی ایم سے رقم نکلوا کر موٹر سائیکل پر جا رہا تھا کہ 2 ڈاکوؤں نے اسے روک لیا۔عزیز نے مزاحمت کی تو ڈاکوؤں نے فائرنگ کر دی جس کے نتیجے میں وہ جاں بحق ہو گیا جبکہ ڈاکو واردات انجام دینے کے بعد باآسانی فرار ہو گئے۔ لاہور کے علاقے اسلام پورہ میں مبینہ مقابلے میں ایک پولیس اہل کار زخمی ہو گیا، ایک ڈاکو پکڑا گیا۔ اسلام پورہ کے علاقے سنت نگر میں ہندو کیمپ کے قریب 2 ڈاکو ایک شہری سے موٹر سائیکل چھین کر فرار ہو رہے تھے کہ شہریوں نے انہیں گھیر لیا۔ اطلاع ملنے پر پولیس موقع پر پہنچی تو ڈاکوؤں نے فائرنگ کر دی جس سے ایک اہل کار زخمی ہو گیا، شہریوں نے ایک ڈاکو کو پکڑ لیا اور اس کی پٹائی کرنے کے بعد اسے پولیس کے حوالے کر دیا۔ دوسرا ڈاکو فرار ہونے میں کامیاب ہو گیا جبکہ زخمی پولیس اہلکار کو اسپتال منتقل کیا گیا جہاں اسے طبی امداد دی گئی۔ ادھر لاہور کے نواحی علاقے مانگا منڈی سے فیض آباد جانے والی سڑک پر مبینہ ڈاکوؤں نے لوٹ مار کے دوران مزاحمت پر فائرنگ کر دی۔ فائرنگ سے 12 سالہ لڑکے سمیت 3 افراد زخمی ہو گئے جو ہٹھار گاؤں کے رہائشی ہیں، فائرنگ کے بعد ڈاکو فرار ہو گئے جبکہ زخمی افراد کو طبی امداد کے لیے اسپتال منتقل کیا گیا۔
