جمعرات , 16 جنوری 2020ء
(218) لوگوں نے پڑھا
تاریخی شاہی قلعہ میں شادی کی تقریب کے معاملے پر ڈائریکٹر مارکیٹنگ آصف ظہیر کو عہدے سے ہٹا دیا گیا۔ذرائع کا کہنا ہے کہ شاہی قلعے میں آصف ظہیر نے شادی کی تقریب کے معاملات طے کیے تھے۔واضح رہے کہ چند روز قبل ملک کے بڑے صنعتکار کے صاحبزادے کی دعوت ولیمہ کے لیے بین الاقوامی ورثہ شاہی قلعہ کو شادی ہال بنادیا گیا تھا۔شادی شاہی باورچی خانہ میں منعقد کی گئی تھی، دعوت ولیمہ میں ڈھائی سے تین سو افراد شریک ہوئے تھے، شاہی باورچی خانہ میں باقاعدہ قناتیں گاڑھی گئیں اور دیواروں پر فانوس لٹکائے گئے جبکہ تقریب کے بعد قلعے کے مختلف حصوں میں کچرا اور بچا کھچا سامان بھی پھینک دیا گیا تھا۔اجازت نامے کے برعکس کارپوریٹ ڈنر کی بجائے قلعے میں شادی کی تقریب منعقد کی گئی تھی۔ کمشنر لاہورڈویژن کی جانب سے گزشتہ روز انکوائری رپورٹ چیف سیکرٹری کو پیش کر دی گئی ہے جس میں والڈ سٹی اتھارٹ کوذمہ دارقرار دیاگیاہے۔
