فیروز پور روڈ سے ملحقہ روہی نالے پر واقع اللہ ہو انڈسٹری اسٹیٹ غیر قانونی تعمیرات کا مرکز بن گئی

محکمہ ایل ڈی اے کے ٹائون پلاننگ ڈائریکٹوریٹ کے افسران کی سرپرستی میں فیروز پور روڈ سے ملحقہ روہی نالے پر واقع اللہ ہو انڈسٹری اسٹیٹ غیر قانونی تعمیرات کا مرکز بن گئی ہے، سینکڑوں کنال اراضی پر لاتعداد غیر قانونی زیر تعمیر عمارتیں ٹائون پلاننگ، ڈائریکٹوریٹ کی کارکردگی کا منہ چڑا رہی ہیں، قواعد و ضوابط کے برعکس اللہ ہو انڈسٹریل اسٹیٹ میں لاتعداد عمارتیں زیر تعمیر، متعدد عمارتوں کی غیر قانونی طریقے سے تعمیرات مکمل کی جا چکی ہیں جبکہ طاقتور ترین مافیا نے ایل ڈی اے کے گڈگورننس کے دعوے اللہ ہو انڈسٹریل اسٹیٹ میں زیر تعمیر غیر قانونی عمارتوں کی بنیادوں میں دفن کر دیئے ہیں، مذکورہ کنٹرول ایریاز میں غیر قانونی تعمیرات کے خلاف کارروائی میں ناکامی کے باعث ایل ڈی اے کو گزشتہ دس برس کے دوران فیسوں کی مد میں کروڑوں روپے کے نقصان کا سامنا ہے، تاہم ایل ڈی اے کا ٹائون پلاننگ ونگ نومبر 2010ء کے دوران اللہ ہو انڈسٹریل اسٹیٹ کے بلڈنگ کنٹرول سے متعلق ہونے والے حتمی فیصلے پر عملدرآمد سے مسلسل گریزاں ہے۔