جمعرات , 22 اکتوبر 2020ء
(167) لوگوں نے پڑھا
وزیر اعظم کی ہدایت پر اشیائے ضرورت کی مقررہ نرخوں پر وافر مقدار میں دستیابی یقینی بنانے کیلئے پنجاب حکومت نے صوبے میں 223سہولت بازاروں کو مکمل فعال کر دیا ہے جہاں آٹا اور چینی سمیت دیگر اشیاء رعائتی نرخوں پر دستیاب ہیں۔یہ بات چیف سیکرٹری پنجاب جواد رفیق ملک کی زیر صدارت پرائس کنٹرول کے سلسلے میں روزانہ منعقد ہونے والے جائزہ اجلاس میں بریفنگ کے دوران بتائی گئی ۔اجلاس سے خطاب کرتے ہوئے چیف سیکرٹری نے کہا کہ سہولت بازاروں کے قیام کا مقصد عام آدمی کوریلیف کی فراہمی کے ساتھ ساتھ اوپن مارکیٹ میں قیمتوں کو اعتدال پر لانا بھی ہے،وزیر اعلیٰ پنجاب کی ہدایت کے مطابق صوبے میں 396سہولت بازار قائم کئے جائیں گے۔انہوں نے ہدایت کی کہ ذخیرہ اندوزی اور گرانفروشی کی روک تھام کیلئے پوری سپلائی چین پرکڑی نظر رکھی جائے اور ڈپٹی کمشنرز منڈیوں میں نیلامی کے عمل کی خود نگرانی کریں۔ انہوں نے کہا کہ مہنگائی کے مسئلے کے مستقل حل کیلئے سپلائی چین مینجمنٹ کا پورا نظام وضع کرنا ہوگا ۔ چیف سیکرٹری پنجاب جواد رفیق ملک نے سیکرٹری خوراک سے فلور ملوں کی مانیٹرنگ سے متعلق تفصیلی رپورٹ بھی طلب کر لی۔
