گوجرہ میں کبڈی کے فروغ کیلئے ہر ممکن تعاون کرینگے :صدر چیمبر آف کامرس

فیصل آباد چیمبر آف کامرس اینڈانڈسٹری پنجاب کے روایتی کھیل کبڈی کے فروغ کیلئے ہر ممکن تعاون کرے گا، جبکہ گوجرہ چیمبر کی کبڈی ٹیم کیلئے منتخب ہونے والے 20کھلاڑیوں کو مختلف صنعتوں میں ملازمتیں بھی مہیا کی جائیں گی۔ یہ بات فیصل آباد چیمبر کے صدر رانا محمد سکندر اعظم خاں نے کبڈی بارے قائمہ کمیٹی کے اجلاس سے خطاب کرتے ہوئے کہی۔ انہوں نے بتایا کہ فیصل آباد چیمبر آف کامرس اینڈانڈسٹری کی ٹیم کو ہر ممکن سہولتیں بھی مہیا کی جائیں گی تاکہ وہ مستقبل میں عالمی سطح پر پاکستان اور اس ادارے کا نام روشن کر سکیں ۔ انہوں نے بتایا کہ اس سال ورلڈ کپ کبڈی ٹورنامنٹ بارہ سے چودہ اگست تک گوجرہ  میں ہوگا  انہوں نے مزید بتایا کہ اس ٹورنامنٹ کے سلسلہ میں روزانہ تین میچ ہوں گے ۔ انہوں نے کہا کہ کبڈی ہمارا روایتی کھیل ہے اس میں لوگ بھر پور دلچسپی لیتے ہیں اور توقع ہے کہ ٹورنامنٹ میں زیادہ ہجوم ہو گا۔ انہوں نے بتایا کہ اس ایونٹ کی بھر پو ر تشہیر کی جائے گی۔ رانا محمد سکندر اعظم خاں نے بتایا کہ ورلڈ کپ ٹورنامنٹ میں بھارتی پنجاب اور ہریانہ کی ٹیمیں بھی حصہ لیں گی ۔