Chinot City
بدھ , 21 اکتوبر 2020ء
(1107) لوگوں نے پڑھا
چنیوٹ کے عالمی مجلس تحفظ ختم نبوت کے مرکزی مبلغ مولانا غلام مصطفی نے میڈیا سے گفتگو کرتے ہوئے کہا کہ آل پاکستان 39 ویں سالانہ ختم نبوت کانفرنس مسلم کالونی چناب نگر کی انتظامیہ کے وفود اور کارکنان کی آمد شروع ہوگئی ہے۔ متعدد علماء کرام نے اپنی اپنی کمیٹیوں سے مشاورتی اجلاسوں کا سلسلہ جاری رکھا ہوا ہے۔ ضلعی انتظامیہ کے افسران نے کانفرنس کے پنڈال میں انتظامات کا جائزہ لیا۔ کل منعقد ہونے والی کانفرنس میں تمام مکاتب فکر کے علماء کرام اور رضا کاران ختم نبوت شریک ہوں گے۔ یاد رہے کہ عالمی مجلس تحفظ ختم نبوت کے زیر اہتمام منعقد ہونے والی 39 ویں آل پاکستان سالانہ ختم نبوت کانفرنس مسلم کالونی چناب نگرمیں منعقد ہورہی ہے۔ مختلف نشستوں کی صدارت امیر مرکز مولانا ڈاکٹر عبدالرزاق اسکندر، مولانا پیر حافظ ناصر الدین خاکوانی، مولانا صاحبزادہ خواجہ عزیز احمد سمیت خانقاہ سراجیہ کے سجادہ نشین مولانا صاحبزادہ خلیل احمد، مولانا عزیز الرحمن جالندھری، مولانا سید جاوید حسین شاہ، مولانا محب اللہ سمیت دیگرمشائخ اور روحانی شخصیات کریں گی۔ کانفرنس کے لئے تمام تر شعبہ جات کے لیے بھرپور انتظامات کئے جارہے ہیں۔ کانفرنس کے منتظمین مولانا اللہ وسایا، مولانا غلام مصطفی، مولانا عزیز الرحمن ثانی، مولانامحمد اسماعیل شجاع آبادی، قاضی احسان احمد، مولانا عبدالحکیم نعمانی، مولانا محمد وسیم اسلم اور مولانا عبدالنعیم نے کانفرنس کے انتظامات کے حوالہ سے پریس کانفرنس سے خطاب کرتے ہوئے کہا کہ کانفرنس میں ملک بھر سے حسب سابق ہزاروں مسلمان شرکت فرمائیں گے۔ کانفرنس میں ناموس رسالت اور عقیدہ ختم نبوت کے تحفظ کے لئے تجدید عہد کا اعلان کیا جائے گا۔ انہوں نے کہا کہ قادیانیوں کی ملک بھر میں بڑھتی ہوئی سرگرمیوں، تحفظ ناموس رسالت اور ختم نبوت کے قوانین کے خاتمہ کے متعلق قادیانیوں کی ریشہ دوانیوں کے انسداد کے لئے لائحہ عمل پیش کیا جائے گا۔ اس کے علاوہ قادیانی جماعت کے سربراہ مرزا مسرور احمد سمیت تمام قادیانیوں کو دعوت اسلام کے فریضہ کا بھی اعادہ کیا جائے گا۔ ضلع چنیوٹ کی انتظامیہ جن میں ڈی پی او، ڈی سی او چنیوٹ، ایس پی لالیاں، سیکورٹی انچارج سمیت کئی افسران نے انتظامات کا جائزہ لیا۔ انتظامات میں مزید بہتری لانے کے لئے اقدامات پر غور کیا گیا۔ تمام شرکاء سے اپیل کی گئی کہ تلاوت قرآن مجید اور درود پاک کا ورد کرتے ہوئے پنڈال میں داخل ہوں۔
