سمندری سے بم برآمد ہونے کے واقعے کی خبر جھوٹی نکلی

سمندری۔ (15 مئی 2019ء ) فیصل آباد کی تحصیل سمندری کے علاقے انار کلی بازار میں بم برآمد ہونے کے واقعے کا ڈراپ سین ہو گیا۔ برآمد ہونے والے پیکٹ سے بارودی مواد برآمد نہیں ہوا.میڈیا رپورٹس کے مطابق برآمد ہونے والا بم جعلی نکلا۔ ذرائع کے مطابق علاقہ میں خوف و ہراس پھیلانے کے لیے پرفیوم کی ڈبے کو بم کی شکل دی گئی۔تخریب کاروں نے پرفیوم کے ڈبے کو بم کی شکل دینے کے لیے ڈبے پر تاریں، سیل بیٹری اور ٹائم ڈیوائس بھی لگائی۔ سی پی او فیصل آباد اظہر اکرم اور ڈپٹی کمشنر سیف اللہ ڈوگر بھی موقع پر پہنچے۔ پولیس کے مطابق 2 ملزمان گرفتار ہیں جن سے تفتیش کی جا رہی ہے۔خیال رہے اس سے قبل رپورٹ سامنے آئی تھی کہ فیصل آباد کے تحصیل سمندری میں المیکسی سنٹر سے بم برآمد ہوا ہے. میڈیا رپورٹس میں بتایا گیا تھا کہ سمندری میں شاپنگ سنٹر سے ملنے والا بم ناکارہ بنا دیا گیا ہے۔ پولیس کی بھاری نفری موقع پر پہنچ گئی ہے جبکہ پولیس ذرائع کا کہنا تھا کہ دو مشکوک افراد کو حراست میں لے لیا گیا ہے۔ بم برآمد ہونے کے بعد پولیس نے بازار کو بند کرکے سرچ آپریشن شروع کردیا ہے۔