’دھواں‘ ڈرامے کے اہم کردار بشیر باورچی کا تعلق سمندری کے کس چک سے ہے۔۔۔؟

1991 کے مشہور و معروف ڈارمہ سیریل دھواں میں بشیر باورچی کے کردار کو ڈرامہ دیکھنے والوں میں سے کون بھول سکتا ہے جن کے کردار نے ڈرامہ کو چار چاند لگادیئے تھے۔ بشیر باورچی کا کردار ادا کرنے والے فنکار فیاض احمد پروانہ کا تعلق سمندری کے نواحی گاؤں چک نمبر 442 گ ب سے ہے۔ فیاض احمد پروانہ کو بشیر باورچی کا کردار بہترین طریقے سے ادا کرنے پر پی ٹی وی کی جانب سے ایوارڈ بھی مل چکا ہے۔ فیاض احمد پروانہ نا صرف دھواں جیسے سپر ہٹ ڈرامے میں اداکاری کے جوہر دکھا چکے ہیں بلکہ 10 سے زیادہ ڈراموں جن میں ارتقاء، صحرا، پیاس شامل ہیں، میں بھی کام کرچکے ہیں۔ فیاض احمد پروانہ اس وقت حجام کا کام کرکے اپنی روزی حاصل کرتے ہیں ان کا کہنا تھا کہ پیٹ بھرنے کے لئے کچھ نا کچھ کرنا پڑتا ہے۔ میڈیا انڈسٹری کے حالات ناساز ہونے کی وجہ سے ٹی وی میں کام نہیں مل سکا۔ انہوں نے نا صرف ڈرامہ دھواں میں اداکاری کی بلکہ ڈرامہ میں اپنی آواز کا جادو جگاتے ہوئے بھی ناظرین کو محظوظ کیا۔ وہ آج بھی ڈرامہ میں اپنے گائے گئے گانے کو اسی طرح گاکر اس وقت کو یاد کرتے ہیں۔ صوبائی و مرکزی حکومتوں کو فنکاروں کو ریلیف دینا چاہیے تاکہ فنکار اپنے فن کو ادا کرتے رہیں اور انہیں اس سلسلے میں کسی قسم کی دشواری نا ہو۔