خواتین کا عالمی دن، اور عورت مارچ کی حقیقت

آج دنیا بھر میں خواتین کا عالمی دن منایا جارہا ہے۔ ہر سال اس دن کو پاکستان میں منانا دراصل یہ ظاہر کرتا ہے کہ پاکستان بھی عالمی برادری کا حصہ ہے۔ مہذب اور باوقار قوموں کا شیوہ ہوتا ہے کہ وہ عالمی سطح پر ہونے والے ہر اچھے قدم کے ساتھ قدم ملائیں۔ دنیا بھر میں عورتوں کو جہاں آزادی حاصل ہے وہیں کچھ جگہوں پر انہیں مسائل کا سامنا بھی ہے۔ پاکستان اور دوسرے اسلامی ممالک کی اگر بات کریں تو نسبتاً غیر اسلامی ممالک کے یہاں عورتوں کو قریب قریب تمام بنیادی حقوق حاصل ہیں پاکستان جیسے معاشرے میں تو عورت کو گھر کی مالکن کے سے تمام اختیارات حاصل ہوتے ہیں۔ ماضی قریب سے پاکستان کے اندر ایک نئے طبقے نے جنم لیا ہے جو عورت کی آزادی کے نام پر لامحدود مطالبات لے کر سامنے آیا ہے اور ہر سال عورتوں کے دن کے موقع پر وہ اپنا پروپیگنڈا شروع کردیتا ہے قطع نظر اس سے کہ پاکستان میں عورتوں کے حقوق کے متعلق کچھ اصلاحات کی ضرورت ہے لیکن یہ لامحدود آزادی کا تصور پاکستان جو کہ اسلامی تشخص رکھتا ہے یا رکھنے کی قوت رکھتا ہے، یہاں یہ نعرہ بلند کرنا کہ عورت مادر پدر آزاد ہے ظلم و زیادتی کے ساتھ ساتھ سراسر ناقابل قبول ہوگا۔ پاکستان میں ایک معقول و مناسب فضا قائم ہے جہاں عورتوں کو مکمل آزادی حاصل ہے عورتیں جہاں صرف گھروں کی ہی زیب زینت ہوتی تھیں اب دور کے تقاضے بدل جانے پر وہ دوسرے شعبہ جات میں بھی پیشہ ور خدمات سرانجام دے رہی ہیں۔ حوا کی بیٹی پاکستان میں آزاد اور محفوظ ہاتھوں میں ہے۔