ڈولفن اہلکاروں کی موٹرسائیکلیں چوری، پولیس کا درخواستیں وصول کرنے سے انکار

فیصل آباد میں واقع پولیس لائن بھی چوروں سے محفوظ نا رہی ڈیوٹی پر گئے ڈولفن اہلکاروں کی موٹرسائیکلیں چوری کرلی گئیں۔ تفصیلات کے مطابق ڈولفن اہلکار عدیل اور طارق کی پولیس لائن کے اندر کھڑی موٹرسائیکلیں چوری کی گئیں۔ دونوں اہلکاروں نے الزام لگایا کہ اپنی موٹرسائیکلوں کی تلاش کے لئے جب پنجاب پولیس کو درخواست دینا چاہی تو پولیس اہلکاروں نے یہ کہتے ہوئے درخواست لینے سے انکار کر دیا کہ آپ درخواست میں جائے وقوعہ میں پولیس لائن کی بجائے باہر کسی جگہ کا نام لکھیں اس کے بعد درخواست لی جائے گی۔ اس واقعہ پر اہلِ علاقہ نے پولیس والوں کو تنقید کا نشانہ بناتے ہوئے کہا کہ جانباز اور فرض شناس اہلکاروں کے ساتھ پولیس کا یہ ناروا سلوک ہے تو باقی عوام کے ساتھ کیسا سلوک ہو گا؟ اور تشویش کا اطہار کرتے ہوئے کہا کہ پولیس لائن کے اندر تک چوروں کی اتنی رسائی ہے کے وہ  واک تھرو گیٹ، حساس آلات اور سکیورٹی پر مامور اہلکاروں کی آنکھوں میں دھول جھونک کر موٹرسائیکلیں لے جاسکتے ہیں تو بارود یہاں سے گزار کر پولیس لائن کو نہیں اڑایا جاسکتا؟ یا پھر اس واقعے میں پولیس اہلکار بھی ملوث ہیں؟ شہریوں نے سی پی او فیصل آباد محمد سہیل سے اپیل کی  ہے کہ جن ڈولفن اہلکاروں کی موٹرسائیکلیں چوری ہوئی ہیں انہیں فوری موٹرسائیکلیں فراہم کی جائیں اور جو اہلکار چوری میں ملوث ہیں یا جن نااہل پولیس اہکاروں نے درخواست وصول کرنے سے انکار کیا ہے ان کے خلاف کارروائی کی جائے۔