ایف ڈی اے سٹی ہاؤسنگ سکیم میں واجبات کے دیرینہ نادھندگان کے پلاٹس منسوخ

ڈائریکٹر جنرل ایف ڈی اے محمد سہیل خواجہ نے کہا ہے کہ محکمہ ایف ڈی اے نے ایف ڈی اے سٹی ہائوسنگ سکیم میں واجبات کے دیرینہ نادھندگان کے پلاٹس منسوخ کردیئے گئے ہیں مختلف کیٹگریز کے ان منسوخ شدہ پلاٹس کو نیلام عام کے ذریعے فروخت کیاجائیگا۔ انہوں نے کہا کہ ایف ڈی اے سٹی ہائوسنگ سکیم کے پلاٹس کی الاٹمنٹ کیلئے قرعہ اندازی 2005ء میں ہوئی تھی اور کامیاب درخواست دھندگان 31مارچ 2007ء تک چھ اقساط میں واجبات کی ادائیگی کے پابند تھے تاہم بعد ازاں الاٹیز کو 2011 تک مہلت دی گئی تھی کہ وہ سہولت کیساتھ واجبات کی ادائیگی کرسکیں لیکن اس عرصہ کے اندرادائیگی میں ناکامی پر ان کے پلاٹس منسوخ کردیئے گئے ۔ انہوں نے بتایاکہ دو یا دو سے زائد اقساط جمع کروانے والے الاٹیز کو مزید 45دن کی مہلت دی گئی تھی کہ وہ ادائیگی کرکے پلاٹس بحال کراسکتے ہیں جبکہ کل واجبات کے صرف چوتھائی حصہ کی ادائیگی کرنے والوں کو کوئی مہلت نہیں دی گئی تھی۔ انہوں نے بتایاکہ ایک کنال ، دس مرلہ اور پانچ مرلہ کے منسوخ شدہ 38پلاٹس کو نیلامی کیلئے منتخب کیاگیاہے تاہم ایف ڈی اے انتظامیہ کی طرف سے ان پلاٹس کے الاٹیز کے مفادات کو مدنظر رکھتے ہوئے چار ستمبر2020 تک مزید مہلت دی گئی ہے کہ اگر وہ تمام واجبات کی یکمشت ادائیگی کریں تو ان کے پلاٹس مجوزہ نیلامی سے نکال دیئے جائینگے۔