منگل , 08 ستمبر 2020ء
(136) لوگوں نے پڑھا
تفصیلات کے مطابق پنجاب کے شہر فیصل آباد میں پولیس نے بچوں سے زیادتی اور قتل کی وارداتوں میں ملوث چار ملزمان کو مقابلے کے دوران ہلاک کردیا۔ پولیس کا کہنا ہے کہ ملزمان بچے سے زیادتی اور قتل کی وارداتوں میں ملوث تھے، ملزمان سجاد ڈھولکی اور اللہ رکھا نے یکم ستمبر کو زین علی کو قتل کیا تھا۔ پولیس نے موقف اختیار کیا ہے کہ گرفتار ملزمان سجاد اور اللہ رکھا کو اسلحہ برآمدگی کےلیے لے جایا جارہا تھا کہ صدر تھانہ کی حدود میں بائی پاس کے مقام پراچانک زیر حراست ملزمان کو چھڑانے کےلیے آٹھ دیگر ملزمان نے پولیس پارٹی پر فائرنگ کردی۔ پولیس حکام کا کہنا ہے کہ فائرنگ کے تبادلے میں سجاد ڈھولکی ، اللہ رکھا ، عابد حسین اور خالد ہلاک ہوگئے، ہلاک ڈاکو عابد ڈکیتی و رہزنی کے 41 جبکہ خالد 43 مقدمات میں ملوث تھا۔ چاروں لاشیں پوسٹمارٹم کے لیے الائیڈ اسپتال منتقل کردی ہیں۔ اس سے پہلے گزشتہ روز 14 سالہ زین کے اغوا اور قتل کا مقدمہ درج ہونے کے بعد دوران تفتیش سی سی ٹی وی فوٹیج سے زین کو سجاد عرف ڈھولکی کے ساتھ جاتے ہوئے دیکھنے پر جب پولیس نے سجاد سے تفتیش کی تو اس نے اپنے ساتھی اللہ رکھا کے ساتھ مل کر زین کو بدفعلی کے بعد قتل کرنے کا اعتراف کیا اور زین کی لاش کو ماڈل سٹی کے قریب کماد کی فصل سے گڑھا کھود کربرآمد بھی کروایا تھا ۔
