تعلیمی اداروں کے مسائل حل کرنے کے لیے نجی سکولوں کو فنانشل پیکیج دینے کا مطالبہ

نجی سکولز ایسوسی ایشنز کے نمائندہ وفد نے چیئرمین قومی اسمبلی قائمہ کمیٹی برائے خزانہ و اقتصادی امور فیض اللہ کموکاممبر قومی اسمبلی فیصل آباد  سے ملاقات کی جس میں انہیں کورونا وائرس کے باعث مارچ سے تعلیمی ادارے بند ہونے کی وجہ سے درپیش مالی مشکلات اور تعلیمی اداروں کے مسائل سے آگاہ کرتے ہوئے نجی سکولز کو فنانشل پیکیج دلوانے کی اپیل کی گئی۔ پنجاب، سندھ، خیبرپختونخوا سمیت ملک بھر کی نجی سکولز ایسوسی ایشنز کے چیئرمینز  سے بات چیت کے دوران چیئرمین قائمہ کمیٹی برائے خزانہ فیض اللہ کموکا نے کم فیس والے نجی تعلیمی اداروں کیلئے فنانشل پیکیج کی سفارش کی یقین دہانی کرائی۔ اس موقع پر چیئرمین نیشنل ایسوسی ایشن آف پرائیویٹ سکولز پاکستان صاحبزادہ سجاد مسعود چشتی، چیئرمین ایسوسی ایشن آف پرائیویٹ سکولز خالد حیات کموکا، چیئرمین پرائیویٹ سکولز فورم ندیم سندھو، محمد جمیل نجم، شیخ محمد اکرم، سلیم خان، سید طارق شاہ اور میاں عبدالغفوربھی موجود تھے۔ وفد کی جانب سے چیئرمین قائمہ کمیٹی کو نجی تعلیمی اداروں کی طویل بندش کی وجہ سے طلبا و طالبات کے تعلیمی اور تعلیمی اداروں کے معاشی نقصانات سے آگاہ کیا گیا۔ سکولز مالکان کا کہنا تھا کہ تعلیمی اداروں کی بندش کی وجہ سے بلڈنگز کے رینٹ و سٹاف کی تنخواہیں دینا ان کیلئے بہت مشکل ہو چکا ہے لہٰذا جس طرح حکومت نے دیگر شعبہ جات کو امدادی یکیج دیئے ہیں اسی طرح پرائیویٹ سکولز مالکان کو بھی فنانشل پیکیج دیا جائے۔