ڈپٹی ڈائریکٹر زراعت اختر حسین کی زیرنگرانی کسانوں کی فلاح وبہبود کے سلسلے میں اجلاس

ھنگ، ڈپٹی کمشنر محمد طاہر وٹو کی ہدایت پر ڈپٹی ڈائریکٹر زراعت اختر حسین کی زیرنگرانی کسانوں کی فلاح وبہبود اورمختلف محکمہ جات سے ان کے درپیش مسائل کے ازالہ کیلئے ڈسٹرکٹ ایگریکلچر ایڈوائزری کمیٹی کا اجلاس کمیٹی روم میں منعقد ہوا۔ جس میں محکمہ زراعت، محکمہ انہار، لائیو سٹاک، فیسکو، واٹر مینجمنٹ، سیڈ کارپوریشن بنکوں کے افسران،  کھاد بنانے والی کمپنیوں کے نمائندوں، پاکستان کسان کسان اتحاد کے نمائندوں نے شرکت کی۔ ڈپٹی ڈائریکٹر زراعت اختر حسین نے کہاکہ زراعت ملکی معیشت کی ترقی میں ریڑھ کی ہڈی کی حیثیت رکھتی ہے۔ کسانوں اور کاشتکاروں کی فلاح و بہبود کیلئے حکومت پنجاب نے کسان دوست پالیسیاں مرتب کر رکھی ہیں اس ضمن میں حکومت کی پالیسیوں کے بارے میں کسانوں کوترجیحی بنیادوں پر آگاہ کیاجائے۔ ڈپٹی ڈائریکٹر زراعت نے مزید کہا کہ ضلع میں کھاد اوردیگرزرعی ادویات کی فراہمی کے تسلسل کو یقینی بنائیں غیر معیاری، جعلی ادویات اورکھاد فروخت کرنے والے عناصر کے خلاف سخت قانونی کاروائی عمل میں لائی جائے اور کسانوں کی رہنمائی اوران کی مائیکروفنانسنگ کے سلسلہ میں اپنا کردار ادا کریں۔انہوں نے واپڈا حکام کو ہدایت کی کہ زرعی شعبہ میں بجلی کے بلوں،اوورچارجنگ، ٹرانسفارمرکی عدم دستیابی اورنئے میٹر کی فراہمی سمیت تمام مسائل کا ازالہ کیاجائے۔ محکمہ انہار کے افسران کو ہدایت کی کہ نہری پانی کی چوری کی بیخ کنی، نہروں کی بھل صفائی اورٹیل اینڈ پر واقع زمینوں کیلئے نہری پانی کی دستیابی کو یقینی بنایاجائے۔