جمعرات , 07 جنوری 2021ء
(591) لوگوں نے پڑھا
بھوآنہ کی تحصیل جوڈیشل کمپلیکس سے امین پور بنگلہ روڈ تک پچیس کلومیٹر لمبی روڈ گزشتہ چار سال سے خستہ حالی اور ٹوٹ پھوٹ کا شکار ہے۔ سڑک پر جگہ جگہ گڑھے اور کھڈے ہو چکے ہیں۔ اہلِ علاقہ کو آمد و رفت میں شدید مشکلات کا سامنا کرنا پڑتا ہے جسکو دیکھ کر وکلاء بھی میدان میں آ گئے ہیں. ایڈووکیٹ چوہدری شہزاد ممتاز خان چدھڑ کا کہنا ہے کہ یہ روڈ اہمیت کا حامل ہے اس روڈ کے آس پاس درجنوں دیہات آباد ہیں جہاں کے وکلاء اور سائلین کو کچہریوں میں آنے اور جانے میں دشواری کا سامنا ہوتا ہے. روڑ خراب ہونے کے باعث پبلک ٹرانسپورٹ مکمل طور پر بند ہےجس کی وجہ سے ڈکیتی اور راہزنی کی وارداتوں میں اضافہ ہورہا ہے. اس کے علاوہ حادثات میں بھی اضافہ ہوا ہے۔ حادثہ کی صورت میں ریسکیو عملہ فورا جائے وقوع پر پہنچ نہیں پاتا ہے. کاروبار بھی ٹھپ ہوکر رہ گیا ہے، علاقے کی اجناس کو فیصل آباد اور دوسرے شہروں کی منڈیوں تک لے جانے میں بھی دشواری کا سامنا ہے. اسی حوالے سے وکلاء برادری نے حکومت اور انتظامیہ سے مطالبہ کیا ہے کہ اس روڑ کی جلد از جلد تعمیر و مرمت کا کام شروع کروایا جائے تاکہ عوام کو سفر میں آسانی ہو سکے۔