دھرتی ماں پر قربان ہونے والے سپوت کو سپرد خاک کردیا گیا

وطن کا ایک اور بہادر بیٹا اس عرض پاک پر قربان ہوگیا۔ تفصیلات کے مطابق بھوآنہ کے نواحی گاؤں چک نمبر 204 کے رہائشی پاک فوج کے سپاہی نئیر عباس  پنوں عاقل میں سرپسند عناصر سے جھڑپ کے دوران  فائرنگ سے شہید ہوگئے۔ گاؤں پہنچتے ہی اہل علاقہ نے پھولوں کی پتیاں نچھاور کرتے ہوئے ان کی جسد خاکی کا استقبال کیا، جبکہ نمازِجنازہ اور آخری دیدار دیکھنے کے لئے بھی لوگوں کی کثیر تعداد امڈ آئی۔ نمازِ جنازہ کے بعد شہید کو ان کے آبائی گاؤں  چک نمبر 204 میں پورے فوجی اعزاز  کے ساتھ سپرد خاک کردیا گیا۔ پاک فوج کے چاک و چوبند دستے نے قبر پر سلامی دیتے ہوئے چیف آف آرمی اسٹاف اور دیگر افسران کی طرف سے پھول چڑھائے اور شہید کے درجات کی بلندی لے لئے خصوصی دعا کی۔ اس موقع پر شہید سپاہی کے چچا محمد فاضل نے کہا کہ ہمارا بیٹا شہید ہوا ہے اس سے پہلے اس کا والد پولیس میں سب انسپکٹر تھا وہ بھی شہید ہوا ہمارا شہیدوں کا خاندان ہے ہمیں اس قربانی پر فخر ہے۔ ہمارے بچے پاک آرمی اور ملک پر قربان ہونے کے لئے تیار ہیں۔