پیر محل کی متعدد سڑکیں ٹوٹ پھوٹ کا شکار، حکام نے چپ سادھ لی

 پیر محل شہر کی وسطی شاہراہ کے علاوہ کالونی روڈ، صدر بازار، سکول روڈ، کالج روڈ، تھانہ روڈ اور دیگر سڑکیں ٹوٹ پھوٹ کا شکار ہو چکی ہیں۔ مذکورہ سڑکوں پر پڑنے والے گہرے گڑھے نہ صرف آئے روز حادثات کا سبب بنتے ہیں بلکہ ان سے شہریوں کی قیمتی گاڑیاں تباہ اور وقت ضائع ہوتا ہے ۔ صورتحال کا تشویش ناک پہلو یہ ہے کہ سڑکیں ٹوٹنے کے باعث لوگوں کے کاروبار بھی تباہ ہو رہے ہیں۔ شہریوں کی جانب سے متعدد بار شکایات کے بعد تحصیل انتظامیہ نے ڈنگ ٹپاؤ پالیسی اختیار کرتے ہوئے سڑکوں پر پڑنے والے گڑھوں کو عارضی طور پر ختم کر دیاتھا لیکن چند روز گزرنے کے بعد سڑکوں کی حالت پہلے سے بھی زیادہ خراب ہو گئی۔ شہریوں نے صورت حال پر تشویش کا اظہار کرتے ہوئے کہا ہے کہ تحصیل کا درجہ ملنے کے باوجود شہر کے مسائل میں روز بروز اضافہ لمحہ فکریہ ہے ۔انہوں نے ارباب اختیار سے مطالبہ کیا ہے کہ تمام سڑکوں کی تعمیر ومرمت کا کام ہنگامی بنیادوں پر شروع کیا جائے تاکہ شہریوں کا جان ومال محفوظ رہ سکے ۔"