ریاض فتیانہ اور سونیا علی رضا میں سیاسی اختلافات بڑھتے بڑھتے علیحدگی پر ختم

پیرمحل، تحصیل پیرمحل سے تحریک انصاف کے منتخب ہونے والے ایم این اے اور ایم پی اے کا اتحاد ختم ہوگیا۔ این اے 113 سے تحریک انصاف کے رکن قومی اسمبلی و چیئرمین قائمہ کمیٹی قانون انصاف ریاض فتیانہ اور پی پی 123 سے رکن صوبائی اسمبلی سیدہ سونیا علی رضا شاہ کے درمیان لڑائی اپنے عروج پر پہنچ گئی۔ ریاض فتیانہ نے کارکنوں سے خطاب کرتے ہوئے کہا کہ میرے ایم پی اے سونیا علی رضا شاہ کے ساتھ آج کے بعد کوئی سیاسی تعلق نہیں ہے۔ اگلے الیکشن میں میں اور سونیا مل کر الیکشن نہیں لڑرہے ہیں۔ ریاض فتیانہ کا مذید کہنا تھا کہ اب میں ان کو اپنے پینل میں لینے کے لیے تیار نہیں ہوں یہ اپنی زندگی کی پہلی اور آخری ایم پی اے ہیں جو صرف 9 ووٹ سے جیتی تھیں ان کے پاس یہ آخری موقع تھا جو کہ اپنی نالائقی کی وجہ سے  ضائع کر رہی ہیں۔ ان کا کہنا تھا کہ اگر میں تحصیل پیرمحل میں کوئی بھی کام کرواتا ہوں تو ایم پی اے سونیا علی رضا وزیر اعلیٰ پنجاب، ڈپٹی کمشنر  سے  شکایت کرتی ہے ایم این اے میرے حلقہ میں مداخلت کرتا ہے۔ دوسری جانب سونیا علی رضا کا موقف ابھی تک سامنے نہیں آسکا ہے۔