پشاور ٹریفک پولیس کو گاڑیوں سے زیبرا کراسنگ پر عمل درآمد کروانے کا چیلنج

چیلنج خیبر پختونخوا کے دارالحکومت پشاور میں ٹریفک پولیس نے اپنے ذمے لیا ہے۔ ٹریفک نظام میں بہتری لانے اور انسانی جانیں بچانے کی خاطر سٹی ٹریفک پولیس نے شہر میں مختلف جگہوں پر پیدل چلنے والوں کے لیے مصروف سڑکوں پر نئی سفید و سیاہ لکیریں کھینچ دی ہیں۔ اس مقصد کی خاطر ٹریفک اہلکار ہر زیبرا کراسنگ پر گاڑیوں کو روک کر انہیں ان لکیروں کی اہمیت سمجھا رہے ہیں۔ اس کے علاوہ ڈرائیورز کو روڈ لین لائن ڈسپلن، سیٹ بیلٹ اور ہیلمٹ کے استعمال کے حوالے سے بھی آگاہی دی جا رہی ہے۔ ٹریفک پولیس کے مطابق شہر کی مختلف شاہراہوں پر زیبرا کراسنگ فعال کر دی گئی ہیں جن میں شامی چوک، آرٹلری چوک، میچنی چوک، سورے پل چوک، ڈیفنس کراس، کلب چوک، پولیس لائن چوک اور باغ ناران چوک زیبرا کراسنگ شامل ہیں۔ یہ عمل پشاور ٹریفک پولیس کیلئے کسی چیلنج سے کم نہیں ہوگا کہ وہ گاڑیوں والوں سے زیبرا کراسنگ کی پابندی کروائیں کیونکہ پاکستان جیسے ملک میں جہاں گاڑیوں سے سگنلز پر عمل درآمد کروانا مشکل ہوتا ہے وہاں زیبرا کراسنگ پر پیدل چلنے والوں کیلئے کیا وہ گاڑیوں کو روکیں گے؟