پشاور کا ہوٹل: جہاں مزدوروں کو ہر طرح کا کھانا مفت فراہم کیا جاتا ہے

یقینی طور پر آج کے دور میں بھی ان لوگوں کی کمی نہیں ہے جو خدمت کو اپنا شعار سمجھتے ہیں جہاں سوسائٹی میں نیکی مفقود ہوکر رہ گئی ہو وہاں نیکی کرنے والے کسی بھی طرح سے فرشتوں سے کم نہیں ہوتے۔ پشاور فوارہ چوک پر واقع ندیم ہوٹل غریبوں اور کم آمدنی والے مزدوروں کیلئے مفت کھانا کئی سالوں سے فراہم کررہا ہے۔ ندیم ہوٹل اینڈ ریسٹورنٹ کے نام سے موجود ہوٹل میں روزانہ ایک بجے سے لوگوں کو کھانا فراہم کیا جاتا ہے اور ہر قسم کا کھانا فراہم کیا جاتا ہے۔ یہاں آنے والوں کو کہنا تھا کہ ہم کئی عرصے سے یہاں آکر کھانا کھاتے ہیں اور اپنی مرضی سے جو کھانا چاہیں وہی کھانا ہمیں فراہم کیا جاتا ہے۔ کھانے کے بعد ٹھنڈے مشروبات سے مزدوروں کی تواضع بھی کی جاتی ہے۔ کھانا کھانے والے کھانے کے بعد انتہائی خوشی کا اظہار کرتے ہیں اور اللہ اور ہوٹل مالک کے شکرگزار ہوتے ہیں۔ ہوٹل انتظامیہ کی خاص بات کہ وہ میڈیا پر نہیں آنا چاہتی ان کا کہنا تھا کہ یہ نیکی خالصتاٌ اللہ کی رضا کیلئے کی جاتی ہے اور ہم نہیں چاہتے کی اس جذبے میں کسی قسم کا شائبہ آئے۔ ہوٹل انتظامیہ کا یہ عمل قابل مثال ہے معاشرے کے دوسرے لوگوں کیلئے بھی وہ ایک ایسا فلاحی معاشرہ قائم کرنے کی جانب قدم بڑھائیں جہاں لوگوں کی عزت و وقار میں کمی لائے بغیر ان کی مدد کی جائے۔